Cali Dheere ayaa ugu horeyn sheegay in shirkii Kampala ee Madaxda Afrikaanku ku yeesheen uu ku dhamaaday fashil, isla markaana aanay ka soo bixin wixii laga filayay.

"Shirkaas Afrikaanku ku yeesheen Magaalada Kampala fashil ayuu ku dhamaaday, wixii ay dad badan doonayeen kama soo bixin"ayuu yiri Cali Dheere oo sheegay in madaxda ka qeyb gashay shirkaas ay ku kala qeybsameen ajandayaashii shirka.

Waxaa uu sheegay in Ciidamada loo soo dirayo Soomaaliya ay la kulmi doonaan ciqaab ka daran kuwa ay haatan la kulmaan Ciidamada Brundi iyo Uganda, isagoo dowladaha balan qaaday Ciidamada u jeediyay inay go'aankaas ka laabtaan.

Mar la weydiiyay dagaaladii ka dhacay deegaanka Gal-gala ee u dhaxeeyay Ciidamada Puntland iyo Wadaad diimeed lagu magacaabo Maxamed Saciid Atam oo ah inuu ka tirsan yahay Al-Shabaab ayuu sheegay in dagaalkaas aanay Shabaab ku lug laheyn, isla markaana waxa dagaalamay ay yihiin dadka deegaanka iyo Ciidamada Puntland.

"Warkaas sax ma ahan, dagaalka meesha u dhow Gal-gala ka dhacay, Shabaab kuma lug laheyn, waxaa uu dhex maray dadka deegaanka oo dulmi badan loo geystay iyo Ciidamada PIS-ta ee ashahaado la dirirka"ayuu yiri Cali Dheere.

Dhowaan ayay aheyd markii dagaal ka dhacay duleedka magaalada Boosaaso uu ku dhex maray Maleeshiyaad taabacsan Atam iyo Ciidamada Puntland, iyadoo C/raxmaan Faroole uu sheegay in dagaalka ay la galeen Shabaab.


 

Xafiiska Muqdisho ee  cisaleey.com iyo wararkii ugu danbeeyay

cisaleeynews@hotmail.com