Muqdisho,cisaleey,29.July.2010:Iyadoo labadii maalmood ee la soo dhaafay kulamada Baarlamaanka uu u baaqanayay kooram la'aan ayaa warar soo baxaya ay sheegayaan in inta badan Xildhibaanadii Baarlamaanka ay ka kala dhuunteen magaalada Muqdisho.

Labadii maalmood ee u dambeysay ayaa in ku dhow 50-xildhibaano si qarsoodi ah ugu ambabaxay magaalada Nairobi, kadib markii xildhibaanada qaar ka deyriyeen Xaalada Muqdisho, isla markaana

kooxaha mucaaradka wax ka yar 1-Km u soo jirsaday Madaxtooyada.

Diyaaradaha gaarka loo leeyahay ayaa waxaa lagu arkay iyagoo saaran Xildhibaano iyo saraakiisha ciidamada dowladda, kuwaasoo ka baxsanayay xaalada ay ku sugan tahay Caasimada.

Gudoonka Baarlamaanka ayaa ku tilmaamay xilkas xumo in xildhibaanada ay ka tagaan Caasimada, iyagoo aan ku soo wargelinin, waxaana baaqashada kulamadii baarlamaanka sabab uga dhigeen xildhibaanada dhuuntay.

Xildhibaanada baarlamaanka oo Muqdisho ku heysay xaalado cabsi iyo wal wal ayaa waxay ahaayene kuwo Hotelada ku jira, waxaana mararka qaar dhacda bambaanooyin lagu weeraro hotelada ay degan yihiin.

Sanadkii hore ayay aheyd markii dagaalada ka curteen waqooyiga Muqdisho ay ka carareen Caasimada boqolaal xildhibaano, kuwaasoo saldhigtay magaalada Nairobi.
 

Xafiiska Muqdisho ee  cisaleey.com iyo wararkii ugu danbeeyay

cisaleeynews@hotmail.com