ore sponsortryk med Adidas Musli

Muqdisho,cisaleey,29.Jan.2010 Marka xigta si loo helo nabad waarta dalka iyo dad soomaaliyeed, waxan u arkaa in aan meel aan nabaddu jirin had iyo jeer laga doono, nabadda soomaaliya waxay ku imaanaysaa in wixii nabad la'aanta keenay asalkoodii la abbaaro ee aan faraca la isku daalin waayo, haddii aad geedka laamaha ka gurt way soo baxayaan, haddiise aad xididdada siibto way u dhammaatay geedkaas, sidaas dartted, dhibaatada soomaaliya haysata, oo aanan xaqiiqdii anigu weli maqal cid ka hadashay, qodobkaasina waa xaqiraadda iyo dullaynta hooyo macaan lugu hayo, waxaana qabiilkan lugu wareeray keenay markii hooyo iyo ehelkeedii cadow laga dhigtay aabbe iyo ehelkiisana ilaah laga dhigtay abtiriskiisa ilaa iyo nabi aadam, waayo hooyadu waa NETWORK, dadka dhan walaalaynaysa tusaale kooban haddaan sii bixiyo anigu waxan ka soo jeedaa 2 ruux oo kala ahaa aabbe Cayr Madarkicis iyo Hooyo Gidirey Karanle, laakiin aabbe ehelkiisa keliya ayaan qiimaynaa oo aan dhahnaa waa tolkey H/Gidir (Sacad, Saleebaan, ....), kuwa kale ee la siman ee xagga hooyo ka soo jeeda oo iyaga ka sii xaq badanna shisheeyaan ka dhignaa waa (Mursal Karanle, .... oo hooyo Gidirey Karanle la dhashay), bal yar akhri maansadeyda QABIIL WAA RAGAAD, oo ay ka mid ahayd ereyadeeda:

Soomaalidaas raaracdee kala riddoobaysa

iyagays rajeeyoo facood isu rigeeyeene

midka raaskambooniya midkaa reedda kale jooga

rugta ay ka timid hooyadood raaska cidaheeda

abtigood u roon habaryaroo ruuxa carafsayda

dhab haddaad u sii raadiseed jiridda sii raacdo

sida shabaqa caaradu rartee raadarka ad mooddo

riir qura inan wada nahaad riban lahaydeene

haddii aan ku rayneen sidaa raalli ku ahaanno

riixaanya waxan heli lahayn raaxo aakhiro e

balse raacigaan qabaliyee maanka ka rajoobay

abti baad ruqdaa beerki ood dhiiggi ruxataaye

habaryaro adoo ruugi oo una ribaynaaya

ricirahana aad hooyadaa ruugga uga joogto

sidee baad rilladi eebbe iyo roob ku heli heedhe ?

Qodobkaas Hooyada la dulleeyeyna wuxuu sii dhalay qodob kale oo haddii isaga la saxo uu isna dhib la'aan iska saxmayo, waa cudurkan na dullaystay ee AIDHIS nooga daran ee Hayb sooca lugu xaqirayo dad nala dhashay oo aan xaqirnayne nooba horreeya aaduun iyo aakhiro.

Qodobkaas isaga ahna waxan mahad uga celinayaa ilaaha boqorka ahi raalli ha ka noqdee Prof, Waddani, Mu'min, Abwaan: Max'ed Warsame 'Hadraawi' uu uga hadlay maansada DHUL GARIIR, ee uu weliba u billaabay halkii uu lahaa: XAAJADA HALKAAS BAAN DHIGOO DHAABAD BAW DIHINE, IN LA SII DHAQAAJEY RABTAA DHAYGAG BADANLEEYE,.... DHAXALKEEDA NIMANKII LAHAA WAY DHEBAANDHEBIYE, IYAGAA DHARAARABA HALKAAN DHAAFAY SII ORANE.

Sidaas darteed, halkaas qodob ee fudaydka haddii loo dhaqaaqo dhawr bilood gudahood ayey soomaalidu ku midoobaysaa, isku jeclaanaysaa, cadow iyo danaystena uunan soo dhex geli doonin insha allaah, .... laakiin waxan leeyahay car ha loo dhaqaaqo oo keliya yaan lacag la bixinoo qaaraan la aruurine, hooyo ha la qiimeeyo, oo yaan abaal kale loo geline keliya 33.5% oo xaqeeda ka mida ha loo qiro, illeen aababy 3 ugu laban laabantaaye.

ALLOW NUGU TOOSI.

Max'ed Cabdi Adam