Dhaawacyo fara badan oo saacadihii u damb-eeyay la dhigay Isbitaalada Muqdisho.

 

Muqdisho,cisaleey,28.July.2010:In ka badan 20-ruux oo ku dhaawacmay dagaalo iyo duqeymaha ka dhacaya magaalada Muqdisho ayaa saacadihii la soo dhaafay la gaarsiiyay Isbitaalada magaalada Muqdisho, waxaana qaar ka mid ah xaaladooda la sheegay inay halis tahay.

Gaadiidka gurmadka deg dega ee Life Line Afrika ayaa shalay casir liiqii waxay ka daabushay gudaha iyo nawaaxiga Suuqa bakaaraha dhaawacyada 19-ruux oo ku dhaawacmay duqeyn loo geystay suuqa.

Cali Muuse Shiikh oo ah madaxa gaadiidka gurmadka deg dega ayaa u sheegay warbaahinta Muqdisho in gaadiidkooda uu shalay keliyay geeyay Isbitaalada Muqdisho dhaawacyo gaaraya sodomeeyo ruux oo gelinkii hore iyo gelinkii dambe ku dhaawacmay dagaalada.

Isbitaalada Madiina, Keysaney iyo Dayniile oo ah saddex isbitaal ee ay gaarsiiyaan dhaawacyada ayaa

xilligan waxay yihiin kuwo la ciir ciiraya bukaanada ku jira, waxaana taas u sii dheer in maalin walba ay qabtaan kiisas dhaawacyo ah oo laga keeno degmooyinka Gobolka banaadir.

Isbitaalka Madiina ayaa hada waxaa uu la buuxsamay qolalkii bukaanada loogu tala galay dhaawacyo fara badan, waxaana taasi ay keentay in barxadaha Isbitaalka iyo goobaha banaan laga taago teendhooyin dhaawacyada lagu dabiibo.

Adeegyada caafimaad ee ay helaan isbitaalada ayaa ah kuwo iska gaabis ah, inkastoo Hey'adaha Laanqeyrta Cas iyo MSF ay gaarsiiyaan isbitaaladu daawooyin, ha yeeshee daawooyinkaas ayaan aheyn kuwo ku filan.

Saraakiisha caafimaadka ee ka howl gala magaalada Muqdisho ayaa sheegay in Isbitaalada mararka qaar daawooyinka ay ku dabiibaan dhaawacyada laga qaado Farmashiyeyaasha gaarka loo leeyahay, waxaana ehelada qofka dhaawacma lagu wargeliyaa inay soo iibsadaan daawooyin.

Xaaladaha cakiran ee ka taagan magaalada Muqdisho ayaa waxay noqdeen kuwo si guud u saameeyay adeegyadii aas aasiga ee bulshada, waxaana Isbitaalada qaar xilliyada habeenkii aysan laheyn koronto marka la gaaro xilliyada dambe, xilligaasoo korontada ay loo damiyo shidaal la'aan.


 

Xafiiska Muqdisho ee  cisaleey.com iyo wararkii ugu danbeeyay

cisaleeynews@hotmail.com